19 Shkurt 2009

"Spiunët", ku gaboi PD

INTERVISTA/ Flet deputeti Sula, anëtar i Komisionit të Ligjeve tregon: Do t‘i korrigjojmë vërejtjet

Erjon Ajazi

Deputeti i Partisë Demokratike, Dashnor Sula, deklaron në një intervistë për "Shqip", se e djathta do të presë vendimin përfundimtar të Gjykatës Kushtetuese dhe më pas do të bëjë korrigjimet në ligjin për "lustracionin". Konkretisht, sqaron ai, ndërhyrja mund të bëhet në ato pika që anëtarët e Kushtetueses kërkojnë ndryshimin për ta çuar më pas sërish në Kuvend për votim. Një ditë pasi e djathta e pranoi me dhimbje vendimin e gjykatës, duket se ajo nuk do të tërhiqet nga ideja për të bërë një ligj të ri për të pastruar politikën dhe drejtësinë nga ish-bashkëpunëtorët e komunizmit. "Unë si deputet i Komisionit të Ligjeve, kam mendimin që ky ligj duhet të bëhej, por rrethi i personave që duhet të përfshiheshin të ishte më i gjerë", vlerëson Sula. Në rrëfimin e tij, deputeti demokrat pranon gjithsesi se nuk mund të thuhet se ky ligj arriti perfeksionin. Duke iu referuar votimit të parë në Gjykatën Kushtetuese, Sula thotë "mua më vjen keq, që edhe anëtarët e tjerë të gjykatës që kanë një integritet dhe që s‘kishin një prekje të drejtpërdrejtë nga ky ligj kanë marrë një vendim të tillë".

Faktori ndërkombëtar ka kërkuar nga Shqipëria që të dënojë krimet e komunizmit, por kohët e fundit ndodhi një përplasje mes eksponentëve të lartë të PD-së dhe diplomatëve të huaj në Tiranë për ligjin e ‘dosjeve‘. Prapa kësaj fshihet një lojë politike, apo ligji nuk ishte i hartuar mirë, duke cenuar të drejtat e njeriut?

Bashkimi Evropian dhe faktori ndërkombëtar kanë qenë gjithmonë për dënimin e krimeve të komunizmit. Ky është një proces mjaft i hershëm dhe doja të kujtoja që ligji i lustracionit është një ligj i cili të gjitha shtetet e vendeve postkomuniste kanë përgatitur një ligj të tillë dhe kjo tregon se ka edhe modele që shoqëria shqiptare mund t‘i marrë si referencë. Por dua të theksojë se për gjithë politikën shqiptare është bërë një gabim mjaft i madh, pasi ky ligj duhet të kishte kaluar shumë kohë më përpara, është mjaft i vonshëm tani. Duhet të ishte në ligjet e para të shoqërisë pluraliste në ato vite ku shoqëria shqiptare ishte tepër e ndjeshme nga krimet e komunizmit. Kjo do të kishte bërë të mundur që shoqëria shqiptare të mos merrej me një problem të tillë, pasi me vitet që kanë kaluar është krijuar një përplasje e mentaliteteve të ndryshme që kemi sot. Të mendosh dhe të besosh se nuk duhet të dënohen krimet e komunizmit, për pjesën e atij brezi që kanë vuajtur, nuk është gjë e drejtë. Dua të theksoj se mazhoranca për ligjin e lustracionit ka kërkuar që të bashkëpunojë me opozitën, por kjo rezultoi joefikase. Unë si deputet i Komisionit të Ligjeve, kam mendimin që ky ligj duhet të bëhej, por rrethi i personave që duhet të përfshiheshin të ishte më i gjerë. Ju e dini që është miratuar një ligj deri në periudhën 8 dhjetor ‘90, për mendimin tim është një periudhë jonormale, pasi edhe pas viteve ‘90, ose më saktë në shtator të 1991-it kur është miratuar edhe ligji i amnistisë në Parlamentin e atëhershëm dhe dekretuar nga Presidenti i asaj kohe, mendoj se do ishte periudha më e mirë. Gjithsesi, unë gjykoj se ndjeshmëria ndaj ligjit të lustracionit është mjaft e madhe, ajo ka qenë për sa i përket problemeve të ndryshme, të cilat i trajton ky ligj. Por të them se ky ligj arriti perfeksionin, nuk mund ta them dot, por duke pasur parasysh që modelet e vendeve të Lindjes kanë arritur deri atje që të mos ketë vetëm përjashtimin nga funksione të larta, por kanë pasur edhe ndjekjen penale. Ne kemi zgjedhur modelin çek, që ka vetëm përjashtimin nga detyrat e funksioneve të larta shtetërore dhe jo penalizmin. Këtu theksoj, se nuk duhet ta lëmë në harresë gjithçka ka ndodhur në shoqërinë shqiptare. Nuk më duket e moralshme që bashkëpunëtorët e regjimit komunist të jenë përsëri pjesë e politikës shqiptare, të jenë përsëri pjesë e drejtësisë shqiptare. Ligji përshinte vetëm kategorinë e atyre personave që kanë gjykuar dhe hetuar procese politike për sa i përket pjesës së drejtësisë.

Në fakt, ligji i lustracionit kaloi në disa etapa. Kuvendi e miratoi me shumicë të thjeshtë, opozita e kundërshtoi, Presidenti e kaloi me heshtje, ndërkombëtarët reaguan të shqetësuar, Gjykata Kushtetuese e pezulloi. A parashikohej ky fund, për të rrëzuar ligjin poshtë?

Për të qenë i sinqertë, duke ardhur nga fusha e drejtësisë kam pasur bindjen se Gjykata Kushtetuese do të merrte një vendim pezullimi të këtij ligji. Argumenti është tepër i thjeshtë, duke pasur parasysh që një pjesë e anëtarëve të Gjykatës Kushtetuese kanë pasur konflikt interesi që i prekte ky ligj drejtpërsëdrejti. Unë doja të sqaroja se nuk është normale dhe ky është faji i politikës shqiptare, i Presidentit të Republikës së mëparshëm, që kanë dekretuar gjyqtarë, qoftë në Gjykatën e Lartë dhe Kushtetuese persona që në të kaluarën kanë dhënë vendime ekstreme të dënimeve me vdekje. E them këtë, duke pasur parasysh rrethin e gjerë të juristëve qoftë edhe para viteve ‘90. Unë mund të them që jo të gjithë prokurorët dhe gjykatësit kanë qenë personat që kanë qenë pjesë e një procesi. Absolutisht kanë qenë një pjesë e vogël, të cilët hetonin dhe gjykonin vetëm krime që ishin për agjitacion dhe propagandë dhe kishin besueshmëri shteti partiak i asaj kohe. Absolutisht, të tjerët nuk kishin asgjë në dorë nëse nuk kishin besimin e partisë së asaj kohe. Prandaj nëse mazhoranca do të kishte përgatitur një ligj që do të bënte të mundur largimin nga funksioni i të gjithë gjyqtarëve dhe prokurorëve para viteve ‘90, do të ishte një gjë tepër e rëndë. Por një gjë e tillë nuk ka ndodhur dhe këtu bëhet fjalë vetëm për prokurorët që kanë hetuar proceset politike. Ky numër nuk është i madh, por një numër i vogël, duke pasur parasysh numrin e punonjësve të sistemit të drejtësisë. Të diskutosh sot që preken liritë e të drejtave të njeriut, po të kemi parasysh se shumica e gjyqtarëve dhe prokurorëve nuk preken, se shumica e tyre nuk kanë bërë karrierën e duhur në sistemin e drejtësisë përpara se të emëroheshin gjyqtarë dhe prokurorë duhej bërë një analizë të punës së mëparshme. Nuk do të kishim të tillë përplasje dhe sot nuk do të kishim një vendim të ndërmjetëm. Ne si mazhorancë e kemi dhënë gjykimin tonë. Ka pasur konflikte interesi, do të ishte mirë që të gjejmë module se kush duhet të gjykonte, megjithatë nuk mund të përjashtohet Gjykata Kushtetuese nga gjykimi i një ligji i cili është votuar në Parlament. Unë besoj se pas vendimit që do japë Komisioni i Venecias, mendoj se do të kemi një situatë krejt tjetër. Do të doja të bëja një paralelizëm me kufizimin e imuniteteve që është kërkuar në 2005-ën nga mazhoranca, nuk gjeti mbështetje nga ekspertët juridikë mendojnë se Komisioni i Venecias dha një vendim të vlefshëm që nuk duhet të kemi një imunitet të zgjeruar të deputetëve dhe institucioneve të pavarura kushtetuese. Por politika nuk arriti të bëjë kufizimin e imuniteteve, çka do të thotë se edhe në rastet ku Komisioni i Venecias dha një mendim nuk u arrit një konsensus i tillë.

Një fakt që bie në sy ishte vendimi i Gjykatës Kushtetuese kundër ligjit që ishte 7 me 2. PD e akuzoi Kushtetuesen si të lidhur me të shkuarën komuniste. Në fakt a e priste kampi blu një vendim të tillë?

Në momentin që e kam marrë vesh vendimin e Kushtetueses, menjëherë bindjen e kisha se zoti Xhezair Zaganjori dhe Admir Thanza do të ishin dy personat që do të kishin votuar pro ligjit. Mua më vjen keq, që edhe anëtarët e tjerë të gjykatës që kanë një integritet dhe që s‘kishin një prekje të drejtpërdrejtë nga ky ligj kanë marrë një vendim të tillë. Megjithatë, ky është mendimi i tyre. Mazhoranca do ta respektojë këtë vendim. Ne kishim parashikuar në kalendarin e punimeve të Kuvendit që do të ngrihej autoriteti, çka nuk do të bëhet real. Por shpresoj që ligji të gjykohet në themel së shpejti dhe të ketë një përfundim që mendoj se nuk do të ketë pozitiv, por do të kemi atakim të disa neneve dhe përsëri mazhoranca do të bëjë rregullimet e nevojshme, që me ndihmën e gjykatës të bëjë rregullimet për të pasur një ligj lustracioni, pasi një ligj i tillë është i domosdoshëm.

Pra këtij ligji do t‘i bëhen korrigjime në bashkëpunim me opozitën dhe faktorin ndërkombëtar?

Unë nuk shpresoj që do të kemi një bashkëpunim me opozitën, sepse përfundimisht qëndrimi i opozitës u pa dhe ajo qysh në fillimet e saj kërkonte të kishte një ligj për hapjen e dosjeve në të gjithë shoqërinë shqiptare. Kjo krijon një kaos dhe Partia demokratike ka kufizuar numrin e personave dhe ka mjaft probleme dhe jo më të hapësh dosjet në mënyrë masive. Nuk mund të ngrihet një grup pune për momentin, për sa kohë kemi një pezullim të këtij ligji. Pas një vendimi përfundimtar do të merren hapa të duhur ligjorë dhe hapa politikë të mazhorancës për të marrë një vendim.

Kalojmë në një çështje tjetër që do të jetë kryesorja për katër muajt e ardhshëm. Sa e përgatitur është e djathta për të fituar zgjedhjet?

Unë do të thosha që e djathta në përgjithësi dhe PD në veçanti po punon fort për arritjen e një rezultati pozitiv në zgjedhjet e 28 qershorit. Por përpara se të diskutojmë për zgjedhjet e 2009-ës, unë do të kthehesha pak në retrospektivë duke pasur parasysh mandatin qeverisës së mazhorancës së sotme, dhe do thosha që ne vijmë nga një mandat ku mendoj se është bërë një punë e mirë. Jo se kemi arritur rezultate të shkëlqyera, por kemi bërë një punë shumë të mirë. Po të bësh një analizë me programin e 2005-ës, mund të them se një pjesë e mirë e këtij programi janë realizuar, sidomos në reformat e kërkuara nga Bashkimi Evropian. Lajtmotivi i mazhorancës është pranimi i Shqipërisë në NATO dhe ftesën që do kemi në 3 prill në Strasburg do të thosha që Shqipëria do të ketë të drejtën e anëtarit me të drejta të plota në NATO. Bërja e zgjedhjeve të lira si një kërkesë e rëndësishme e ndërkombëtarëve. Ne do të shkojmë në këto zgjedhje me pasaporta dhe kartat e identitetit.

Risia e këtyre zgjedhjeve është që për herë të parë do të votohet me lista. Elektorati nuk do të votojë për deputetin, por për partitë politike. Mendoni se do të ketë një përplasje mes deputetëve dhe aleatëve, pasi është e paqartë mënyra e bashkëpunimit?

Të gjithë e dimë që me ndryshimet e prillit të 2008-ës tashmë kemi një sistem proporcional rajonal, por do të sqaroja se vota anon më shumë te partitë politike dhe jo te deputetët nuk është totalisht përfundimtare. Për të vetmen arsye, sepse listat që do të paraqiten në bazë të qarqeve do të kenë edhe emrat e deputetëve dhe elektorati do të njihet me listën e këtyre emrave dhe vota nuk do të jetë vetëm për partinë politike, por edhe për listën e deputetëve që forcat politike do të nxjerrin. Por duke pasur parasysh që do të kemi edhe aleanca brenda së djathtës, që do të jenë edhe nga kampi i majtë dhe nga kampi i qendrës, sigurisht do të ketë një formulë që Kodi Zgjedhor e lejon që do të kemi një ndërthurje, që një pjesë e këtyre forcave politike që do të bëjnë një koalicion do të kenë edhe renditjen e kandidatëve të tyre në listat e përbashkëta që do t‘i paraqiten Komisionit Qendror të Zgjedhjeve.

Tërheqja


"Ngrin" Autoriteti i Kontrollit të Figurave


Vendimi i Gjykatës Kushtetuese për pezullimin e ligjit të lustracionit ka frenuar të djathtën për të ngritur Autoritetin e Kontrollit të Figurave. Në kalendarin e punimeve të Kuvendit, ishte parashikuar që zgjedhja e anëtarëve të Autoritetit të bëhej në datë 16 shkurt, por vendimi i shumicës së Gjykatës Kushtetuese ka bllokuar procesin e këtij autoriteti. Deputeti i PD-së, Dashnor Sula, ka sqaruar se "ne kishim parashikuar në kalendarin e punimeve të Kuvendit që do të ngrihej autoriteti, çka nuk do të bëhet real. Por shpresoj që ligji të gjykohet në themel së shpejti dhe të ketë një përfundim ku do të kemi atakim të disa neneve dhe përsëri mazhoranca do të bëjë rregullimet e nevojshme, që me ndihmën e gjykatës të bëjë rregullimet për të pasur një ligj lustracioni, pasi një ligj i tillë është i domosdoshëm".



Përplasja


Pikat më të debatuara të ligjit


Hapja e dosjeve për të gjithë shoqërinë shqiptare cilësohet nga kampi i mazhorancës si një veprim që do të shkaktojë kaos. Duke kundërshtuar këtë nismë të propozuar nga opozita, partia më e madhe në pushtet ka preferuar të marrë modelin çek, duke u fokusuar vetëm te prokurorët dhe gjykatësit. Rasti në fjalë është kundërshtuar nga socialistët, të cilët kanë çuar të parët edhe ankimimin në Gjykatën Kushtetuese. Sipas demokratëve nuk do të prekeshin ata gjyqtarë që kanë ushtruar profesionin e tyre në regjimin komunist, por vetëm ata që kanë bashkëpunuar për hetimin dhe dënimin e njerëzve të akuzuar për qëllime politike përpara viteve ‘90.



Takimi Berisha-Cocker


Kryeministri ankohet

te britanikët për ligjin


Kryeministri Berisha vijoi edhe dje kritikat për Gjykatën Kushtetuese. Kreu i qeverisë duket se nuk do të lërë shans pa shfrytëzuar për t‘u ankuar te faktorët ndërkombëtarë për pezullimin e ligjit të lustracionit nga Kushtetuesja, duke e cilësuar atë si një precedent të rëndë. Dje, ai priti në zyrë ministrin e Shtetit të Britanisë përgjegjës për sigurinë, krimin dhe policinë, Vernon Cocker. Gjatë bisedës me ministrin britanik, Kryeministri Berisha bëri një ekspoze të krimeve që janë regjistruar në vendin tonë gjatë regjimit komunist në fund të viteve ‘80, duke thënë se në Shqipëri janë varur poetë në lule të rinisë, vetëm se ata kanë përmendur në vargjet e tyre shprehjen të drejtat e njeriut, ndërsa trupa të rinjsh janë tërhequr zvarrë në sheshet kryesore të qyteteve të Shqipërisë. Sipas Berishës, "ligji i lustracionit synonte ndarjen nga kjo e kaluar e dhimbshme". Ndërsa e ka cilësuar vendimin e Gjykatës Kushtetuese si të paprecedentë dhe të ndikuar nga kryetari i opozitës, Edi Rama. "Sidoqoftë, qeveria e cila është e angazhuar për një lustracion të bazuar tërësisht mbi parimet e shtetit ligjor, e njohu këtë vendim, megjithëse e konsideron atë një vendim jashtë çdo standardi të shtetit të së drejtës. Nga ana e tij, ministri i Brendshëm britanik, Cocker, iu përgjigj Kryeministrit Berisha se është në nderin e qeverisë shqiptare dhe të Kryeministrit që megjithëse ligji synon të rivendosë integritetin e moralit shoqëror ka vendosur ta trajtojë atë në përputhje të plotë me parimet e shtetit ligjor.

Ina Rama: "Qepeni gojën" për Fazliçin

Serbo-boshnjaku firmos dëshminë prej 15 faqesh


Kryeprokurorja Ina Rama ka
urdhëruar hetuesit e dosjes
"Fazliç të qepin gojën para
gazetarëve, duke mos dashur
të politizojë dosjen. Nëpërmjet
telefonit, por edhe duke kontaktuar
drejtpërdrejt me drejtuesit e
Prokurorisë së Tiranës, numri një
i akuzës shqiptare i ka ndaluar në
mënyrë kategorike publikimet e
akteve të dosjes hetimore. Rama i
cilëson këto akte si sekret hetimor
dhe, nëse dalin publikisht, hetuesit
që nxjerrin këto të dhëna,
por edhe gazetarët që publikojnë
faktet, mund të vihen nën akuzë
për nxjerrje të sekretit hetimor.
Duke dashur të "frikësojë" mediat
e shumta të interesuara për dëshminë
e "mikut" të Kryeministrit
Damir Fazliç në Prokurorinë e
Tiranës për dy ditë me radhë,
kryeprokurorja ka marrë masat e
para. Duket se sulmet e paprecedenta
të politikës shqiptare ndaj
organit të Prokurorisë së Përgjithshme
kanë detyruar kryeprokuroren
të marrë masa ekstreme për
nxjerrjen e sekretit hetimor. Kjo
nuk është hera e parë që numri
një i akuzës shqiptare urdhëron
masa kaq ekstreme për dosje
të rëndësishme. Disa muaj më
parë, akuza qendrore denoncoi
tri media që kishin publikuar
akte hetimore nga dosja Gërdeci.
Dosja ndodhet në Prokurorinë e
Tiranës ku po hetohet gjerësisht.
Heshtja e Fazliç
Për të dytën ditë me radhë,
serbo-boshnjaku Damir Fazliç
është paraqitur para prokurorëve
Dritan Rreshka dhe Besnik Cani
për të dëshmuar në lidhje me
pastrimin e produkteve kriminale
në Shqipëri. Rreth orës 12:00,
i shoqëruar nga dy avokatët e
tij Genc Gjokutaj dhe Ibrahim
Lahi, Fazliç është paraqitur në
prokurori për të fi rmosur dëshminë
që kishte dhënë disa orë
më parë. Ai ka pranuar zyrtarisht
versionin e dëshmisë në anglisht
dhe pasi e ka lexuar disa herë
me radhë në fund ka vendosur
të fi rmosë. Gjithsej janë rreth 15
faqe A4, në fund të çdo letre ka
firmosur Fazliç dhe dy prokurorët,
Dritan Rreshka dhe Besnik
Cani. Krahas kësaj ane, procedurale
Fazliç është pyetur rreth
aktivitetit të tij jashtë Shqipërisë.
Kjo pyetje "do të zbulonte" rreth
transfertave të parave nga Shqipëria
drejt vendeve të tjera. Por
Fazliç, në mënyrë kategorike
ka refuzuar t‘i përgjigjet kësaj
pyetjeje të organit të akuzës,
duke deklaruar se prokuroria ka
ndërmarrë hapat e saj ligjorë për
të mësuar rreth aktiviteteve të tij
jashtë Shqipërisë. Mësohet se ai
ka pohuar se Prokuroria Shqiptare
ka kërkuar informacion për
të nëpërmjet letër-porosive dhe
tashmë hetuesit duhet të presin
kthimin e përgjigjeve. Më pas,
Fazliç ka pohuar se kompetenca
e hetimit të Prokurorisë Shqiptare
ishte vetëm veprimtaria e tij në
Shqipëri, ndërsa aktivitetet e tij
jashtë Shqipërisë nuk përbëjnë
kompetencë lëndore për hetimin
e Prokurorisë Shqiptare. I prerë
në përgjigje, Fazliç ka mohuar
çdo provë të organit të akuzës,
duke deklaruar se nuk ka kryer
asnjë krim. Ai ka pohuar se ka
zbatuar ligjet e shtetit shqiptar,
ndërsa akuzat e mediave për lidhje
me familjarë të politikanëve i
ka cilësuar si ‘qesharake", pasi ai
vërtet ka "mik" Kryeministrin, por
kjo nuk është vepër penale, pasi
çdo kontakt juridik me studion
ligjore "Kola-Malltezi" është e
ligjëruar.
"No comment"
Fazliç ka "sfi duar" për të dytën
herë brenda 24 orëve Prokurorinë
Shqiptare, e cila u mundua disa
muaj më parë ta "ndalonte" teksa
kishte mbërritur në një vizitë
pune në Shqipëri. Dje është futur
në organin e akuzës në mesditë
dhe ka dalë nga akuza 30 minuta
më pas. Fazliç, nuk ka pranuar
të fl asë për mediat e shumta që
ishin grumbulluar, duke deklaruar
se: "Nuk kam asnjë koment
për të bërë". Burime zyrtare nga
Prokuroria e Tiranës konfi rmuan
se serbo-boshnjaku është marrë
në pyetje lidhur me dyshimet për
një kompani fantazmë në Shqipëri
dhe për afera të dyshuara
të pastrimit të parave. Statusi i
tij është person nën hetim. Dy
ditë më parë, Fazliç mbërriti
në Shqipëri, duke prenotuar në
hotel "Sheraton" dhe pasdite
për afro dy orë u mor në pyetje
nga prokurorët Besnik Cani dhe
Dritan Rreshka.
Biznesmeni që njihet edhe si
anglo-boshnjak shoqërohet nga
dy avokatët e tij shqiptarë, Genc
Gjokutaj dhe Ibrahim Lahi.`

Nuk ka para për ish të dënuarit politikë

Dëmshpërblimi, Ministria e Financave kundërshton projektin e qeverisë: Ka kosto të lartë, s‘e përballojmë dot

Eva Gjura

Pamundësia për të përballuar shpenzimet financiare detyroi dje Ministrinë e Financave t‘i kundërvihet projektit të qeverisë për dëmshpërblimin e ish të përndjekurve. "Ligji ka faturë të lartë financiare. Ne nuk e përballojmë dot me kaq pak kohë që na keni vënë në dispozicion", u shpreh Mimoza Dhëmbi, drejtoreshë e buxhetit në Ministrinë e Financave, teksa u pyet në Komisionin parlamentar të Çështjeve Ligjore, instancë që mori në shqyrtim projektligjin për të dënuarit politikë. Gjatë debateve të zhvilluara, drejtoresha e Ministrisë së Financave ju kujtoi anëtarëve të Komisionit të Ligjeve se nisma e deputetit të PD-së, Astrit Bushati, ka një faturë financiare dhe koha prej më pak se 5 muajsh që kërkon kompensimi i ish të dënuarve është shumë e paktë për të bërë të gjitha llogaritjet dhe për të nxjerrë në fund shumën që duhet për të dëmshpërblyer këtë shtresë. Kjo, tha drejtoresha Dhëmbi, bëhet edhe më e vështirë kur në nismën ligjore kërkohet që të zgjerohet rrethi i familjarëve, të cilët do të përfitojnë nga ky dëmshpërblim. Përfaqësuesja e Ministrisë kërkoi më shumë kohë për të shqyrtuar këtë nismë ligjore, teksa nuk përcaktoi qartë se sa do të jetë kostoja që do të shpenzohet për këtë shtresë. Dhëmbi u kujtoi deputetëve të Kuvendit se duhet të kenë parasysh që nisma ngrin shpërndarjen e dëmshpërblimit aktual sipas ligjit ekzistues, i cili në buxhetin e shtetit të vitit 2008 kap shifrën e rreth dy miliardë lekëve. Në argumentimin e ministrisë, zgjerimi i listës së përfituesve është një faturë e madhe suplementare e ligjit ekzistues. Ky qëndrim i Ministrisë së Financave shkaktoi habi te deputetët e mazhorancës në Komisionin e Ligjeve, të cilët i kërkuan drejtoreshës së buxhetit që të mos shprehet menjëherë pa bërë një përllogaritje se sa është shuma që duhet të vërë shteti në dispozicion për ish të dënuarit politikë. Deputetët theksuan se ministrisë do t‘i duhen vetëm pak javë për të bërë llogaritë e duhura, ndaj pas dy apo tre javësh ata duhet të paraqiten në Kuvend për të bërë publike shumën e duhur dhe qëndrimin përfundimtar të ministrisë. Propozimi, ndonëse pa shumë dëshirë, është pranuar nga drejtoresha e Ministrisë së Financave. Pjesë e këtij debati janë bërë edhe deputetët e opozitës në Komisionin e Ligjeve. Deputeti i Partisë Socialiste, Pandeli Majko, nënvizoi se deputetët e mazhorancës po tallen me ish të dënuarit politikë, duke sjellë një projektligj pak muaj para zgjedhjeve dhe tashmë del Ministria e Financave dhe shprehet se nuk e pranon atë, pasi ka kosto të lartë. Por deputeti i PS-së nuk u la të flasë nga kryetari i komisionit, Ilir Rusmali, i cili i kujtoi se nuk i kishte dhënë lejë për të folur, ndaj nuk mund të ndërhynte. Pretendimi nuk u pranua nga deputeti i opozitës dhe shkaktoi më pas debate me kryetarin e komisionit, deri në ndërprerjen e mbledhjes.

Korçë, ekzekutohet në pritë pogradecari me nofkën Nino

Avni Hoxha njihej edhe nga policia si "person problematik"

Juliana Dhimitri

Krimi trondit qytetin e Korçës. Një vrasje e tipit mafioz ka ndodhur në mesditë në një nga lagjet e qendrës së qytetit, në një nga rrugicat e lagjes numër 1. Konflikti që solli vrasjen në Korçë duket se është "importuar" nga Pogradeci nga ku ka ardhur edhe viktima, që sipas policisë është vrarë në pritë. Avni Hoxha 47 vjeç, nga Starova e Pogradecit mendohet se është ndjekur nga persona ende të paidentifikuar që nga qyteti i tij për ta ekzekutuar më pas në Korçë, në kohë dreke pa shumë lëvizje, në një nga rrugicat e qytetit. Ngjarja ka ndodhur në orën 14.00 kur viktima kishte dalë nga shtëpia e dhëndrit të tij, ku kishte qëndruar vetëm disa minuta. Policia dyshon se ai është ndjekur nga autori i krimit, i cili ka gjetur një moment të përshtatshëm kur në rrugicë nuk ka pasur lëvizje. Autori i kësaj ngjarjeje ka qëlluar 47-vjeçarin me pistoletë duke zbrazur të paktën 7 plumba në drejtim të tij, ndërkohë që viktima ka qenë në timon, të paktën 30 metra me larg nga shtëpia e dhëndrit të vet korçar. Sipas policisë, 47-vjeçari ka lënë vajzën e tij të martuar në këtë lagje dhe pasi ka dalë nga shtëpia ka hipur në makinën tip "Volkswagen golf" me targa PG2383B, por pa marrë mirë kthesën ai është qëlluar në mungesë të dëshmitarëve okularë. Makina është përplasur më pas në murin e një shtëpie. Ka qenë shitësja e një dyqani përballë me mjetin ku ndodhej viktima që ka njoftuar banorët e më pas policinë, ndërkohë që sipas banorëve, ata kanë dëgjuar të shtëna të shumta, por kanë menduar se janë fishekzjarrë. 47-vjeçari Avni Hoxha është transportuar drejt spitalit ku dhe ka vdekur disa minuta pas mbërritjes, për shkak të plagëve të marra në trup nga plumbat. Burimet e policisë kanë thënë se ai ka pasur të paktën katër plagë plumbash. Sipas policisë, mendohet se autori ka qenë këmbësor dhe i ka zënë pritë viktimës së tij te kthesa e rrugicës. Për shkak të rrugicave të shumta, autori ka mundur të largohet pa rënë në sy dhe policia dyshon se ai ka dalë më pas në kodrat e qytetit, që janë pranë vendit ku ka ndodhur krimi, duke shmangur kështu edhe dëshmitarët okularë. Sipas shpjegimeve të policisë, autori ka pritur në kthesën më të afërt me banesën ku ishte futur viktima dhe ka dalë papritur ndërsa 47-vjeçari afrohej me mjet. Kur Avni Hoxha ka qenë duke marrë kthesën e rrugicës tjetër, autori ka dalë përballë tij në një distancë shumë të afërt dhe e ka qëlluar disa herë me pistoletë. Në vendin e ngjarjes kanë shkuar forca të shumta policore, që pasi kanë rrethuar vendin e krimit kanë marrë në pyetje vajzën e viktimës, por edhe banorë të zonës, në rast se ata kanë parë persona të dyshimtë. Pogradecari Avni Hoxha, sipas hetimeve paraprake të policisë, mund të jetë vrarë për larje hesapesh. Të gjitha dyshimet e policisë çojnë te një autor i vetëm, dhe që është nga qyteti i Pogradecit. Viktima njihej në zonën e tij me pseudonimin Nino. Sipas policisë, ai njihej si person problematik dhe motivi i vrasjes po kërkohet te konfliktet e vjetra që mund të ketë pasur. Ndërkohë, sipas policisë, pista kryesore e hetimit është ajo e larjes së hesapeve. Vajza e viktimës, ka qenë personi i fundit që e ka parë 47-vjeçarin, por sipas policisë ajo ka deklaruar se nuk ka parë asnjë makinë të dyshimtë në afërsi, gjë që konfirmon se autori ka qenë i vetëm më këmbë edhe pse nuk përjashtohet mundësia që të ketë bashkëpunëtorë, të cilët e kanë ndihmuar të largohet nga vendi i ngjarjes. Sipas të afërmve të Hoxhës, ai nuk ka pasur konflikte kohët e fundit dhe nuk ka shfaqur asnjë shenjë shqetësimi pas mbërritjes në Korçë. Por ndryshe nga herët e tjera, ai nuk ka qëndruar gjatë në shtëpinë e dhëndrit dhe është larguar menjëherë pasi ka lënë vajzën aty.

KE: Gjykata Kushtetuese veproi drejt

"është një shans për të reflektuar në lidhje me detajet e këtij ligji"


Vendimi i Gjykatës Kushtetuese për të pezulluar zbatimin e ligjit të debatueshëm për lustracionin është një zhvillim i mirëpritur. Në këtë linjë u shprehen dje në një deklaratë për shtyp bashkëraportuesit e komitetit monitorues të Asamblesë Parlamentare të Këshillit të Evropës për Shqipërinë Jaakko Laakso( Finlandë) dhe David Wilshire (Mbretëria e Bashkuar). "Gjykata ka përdorur fuqinë e saj për të pezulluar implementimin derisa të marrë një vendim përfundimtar sa i takon ankimit të bërë nga Partia Socialiste, Shoqata Kombëtare e Gjyqtarëve dhe Komiteti Shqiptar i Helsinkit", thuhet në njoftimin e publikuar në faqen zyrtare të Këshillit të Evropës. Bashkëraportuesit takuan javën e shkuar kryetarin e Gjykatës Kushtetuese, Vladimir Kriston. Me këtë rast, ata i sugjeruan gjykatës t‘ia dërgonte ligjin për dhënie këshille Komisionit të Venecias në lidhje me përputhjen e tij me legjislacionin, principet demokratike dhe të drejtat e njeriut. Bashkëraportuesit u shprehen të kënaqur që gjykata ka vendosur të bëjë diçka të tillë. Duke komentuar vendimin e organit të lartë kushtetues, bashkëraportuesit vlerësuan se është gjetur tanimë një mënyrë për të ndaluar, për të reflektuar në lidhje me detajet e këtij ligji shumë të debatueshëm. Wilshire shtoi se "askush nuk po thotë se Shqipëria nuk duhet të ketë një ligj për lustracionin dhe ekspertët janë të gatshëm të ndihmojnë në implementimin e një ligji të tillë". Megjithatë, vijon europarlamentari, disa momente të ligjit aktual duhet vërtet të modifikohen. Ishte pikërisht ligji i "lustracionit", zgjedhjet e 28 qershorit dhe rasti "Biberaj" që sollën vetëm pak ditë më parë në Shqipëri dy reporterët e Asamblesë Parlamentare të Këshillit të Evropës. Jaakko Laakso dhe David Wilshire zhvilluan një sërë takimesh me përfaqësues të ndryshëm të politikbërjes dhe drejtues të institucioneve shqiptare. Presidenca çeke e Bashkimit Evropian ishte një tjetër zë i fuqishëm në kundërshtimin e ligjit të "lustracionit". Kontestimet u përqendruan te mungesa e konsensusit politik mes faktorëve në Parlamentin e Shqipërisë dhe fakti se projekti i mazhorancës binte ndesh me Kushtetutën e Shqipërisë. Vëmendja u përqendrua edhe te drejtësia, ku u theksua se Bashkimi Evropian i kushton të njëjtën rëndësi të madhe mirëfunksionimit dhe pavarësisë së gjyqësorit nga politika. Presidenca çeke atakon drejtpërsëdrejti ligjin e lustracionit edhe kur konstatoi se ligji ngre shqetësime për aspekte të caktuara të tij, që lidhen si me procedurën edhe me përmbajtjen e tij. Ndërkombëtarët sugjeruan në vijimësi që shumica në pushtet të tërhiqte mbrapsht projektin dhe të ia nënshtronte një diskutimi të gjerë mes aktorëve politikë dhe grupeve të interesit.

Gjiknuri: Infrastruktura zgjedhore, qeveria po fsheh të vërtetën



Socialistët rishprehën dje shqetësimin për procesin e pajisjes me letërnjoftime të shqiptarëve, si dhe përgatitjes së infrastrukturës zgjedhore. Nënsekretari për çështjet ligjore, Damian Gjiknuri, tha se ka kaluar mbi një muaj nga fillimi i procesit të aplikimit dhe akoma asnjë shtetas nuk është pajisur me një të tillë, përveç fatlumit që e mori nga dora e Kryeministrit. "Përtej demagogjisë së shpërndarjes me karta, ajo që ka filluar të na shqetësojë më shumë është mungesa e plotë e transparencës dhe informacionit në lidhje me shpërndarjen e sistemit të aplikimit në të gjithë territorin e vendit", theksoi Gjiknuri. Ai nënvizoi faktin se mungesa e transparencës dhe mosbërja publike e një grafiku të qartë të shpërndarjes në territor po shoqërohet edhe me refuzimin sistematik të mazhorancës për ngritjen e një komisioni monitorues parlamentar, të përfaqësuar në shumicë nga opozita. "Ne nuk duam të akuzojmë askënd pa fakte dhe prova konkrete, por njëkohësisht nuk mund të rrimë indiferentë kur ky proces nuk po ecën me ritmin e duhur dhe në një terr të plotë informacioni", tha Gjiknuri. Detyra jonë si opozitë, shtoi ai, na bën që sikundër çdo ditë t‘u bëjmë thirrje qytetarëve të aplikojnë për karta.

LSI nënshkruan marrëveshje me sindikatën e pensionistëve



Ish-kryeministri Ilir Meta nënshkroi dje Marrëveshjen e Bashkëpunimit me Sindikatën e Pensionistëve të Shqipërisë. Kryetari Isa Gorica hodhi firmën mbi dokumentin, duke dhënë edhe vlerësimet e rastit. Meta deklaroi se kjo marrëveshje synon si prioritet programor, jo vetëm deri në 28 qershor, ditën e zgjedhjeve por, ajo çfarë është më e rëndësishmja, pas kësaj dite në qeverisjen e ardhshme të vendit, miratimin e menjëhershëm të projektligjit "Për kujdesin ndaj moshës së tretë". Sipas tij, projektligji është një detyrim jo vetëm moral, jo vetëm njerëzor, jo vetëm politik dhe kushtetues ndaj pensionistëve dhe moshës së tretë, por edhe një detyrim ndërkombëtar në kuadër të integrimit, pasi Shqipëria ka nënshkruar Konventën e Madridit. "Ky është një sistem tepër i deformuar dhe i arnuar herë pas here dhe duhet të jetë një sistem sa më i drejtë nga pikëpamja sociale dhe ne do të synojmë të përjashtojmë diskriminimet që përmbahen sot në sistemin aktual", premtoi Meta. Sakaq, Isa Gorica vlerësoi se grupimi politik që përfaqëson zoti Meta është një grupim politik që ka vizion, por ka dhe veprim. Sepse, nënvizoi Gorica, largimi nga vizioni çon në gabime, ndërsa vetëm vizioni pa veprim kthehet në ëndërr. "Optimalja është vizioni dhe veprimi. Duket se këtu është një arritje e rëndësishme e Lëvizjes Socialiste për Integrim", u shpreh Gorica.

Lëvizja evropiane: Të ulet numri i pasaportave diplomatike

Raporti në njëvjetorin e Marrëveshjes së Lehtësimit të Vizave me vendet e Shengen-it


Një vit pas fillimit të Marrëveshjes së Lehtësimit të Vizave mes Shqipërisë dhe vendeve Shengen, situata duket jo fort optimiste. Lëvizja Evropiane në Shqipëri, në një raport të sajin i kërkon qeverisë të hartojë një plan veprimi me masa konkrete dhe të ndërtojë një sistem të dhënash për 18 kategoritë përfituese, për të ndihmuar përfaqësitë konsullore të vendeve Shengen në vlerësimin e saktë të aplikimeve. "Qeveria shqiptare duhet të krijojë një strukturë të posaçme për të verifikuar kuotat e refuzimeve të vizave, dokumentacionin e kërkuar për mjetet financiare të udhëtimit, rastet e refuzimit të hyrjes, mbajtjen e afateve të pajisjes me vizë, si dhe afatet e paraqitjes së dokumentacionit, lëshimin e vizave afatgjata, harmonizimin e procedurave të lëshimit të vizave te të gjitha përfaqësitë konsullore dhe listat e operatorëve turistikë prej

të cilave do të pranohen grupet turistike", thuhet në raport. Një tjetër sugjerim është monitorimi i veprimtarisë së dhomave

të tregtisë dhe industrisë, rregullshmërisë dhe problemeve që do

të dalin me vizat për komunitetin e biznesit. Lëvizja Evropiane thotë se duhet të rishikohen edhe procedurat dhe praktikat

e lëshimit të pasaportave diplomatike, të shërbimit

dhe përafrimit të tyre me ato të vendeve anëtare të BE-së. "Përcaktimet përjashtuese për pasaportat e shërbimit në MLV

duhet të shërbejnë si mesazh i qartë për qeverinë shqiptare, që

të rregullojë urgjentisht mënyrën se si menaxhohen prej saj këto

dokumente të rëndësishme", nënvizon raporti. Sipas tij, qeveria duket se vazhdon të preferojë rrugën e shkurtër

në vend të zgjidhjeve afatgjata, si opsion për një kategori të caktuar personash, të cilëve u akordohen pasaporta diplomatike dhe shërbimi. "Ndërkohë që në mënyrë të vazhdueshme kërkohet reduktimi i numrit të pasaportave diplomatike dhe të shërbimit vetëm për kategori të caktuara zyrtarësh, në realitet ndodh e kundërta", vijon raporti. Gjatë vitit 2008 janë miratuar tre vendime të Këshillit të Ministrave, që zgjerojnë më tej rrethin e kategorive përfituese me 6 zëra gjithsej për mbajtësit

e pasaportave diplomatike dhe 11 zëra gjithsej për mbajtësit e

pasaportave të shërbimit, duke e çuar në total numrin e përfituesve nga vitet e mëparshme për: pasaporta diplomatike 58 + 6 = 64 kategori gjithsej dhe pasaporta shërbimi 63 + 11 = 74 kategori gjithsej. Raporti u sugjeron përfaqësive konsullore të vendeve Shengen, të zbatojnë me përpikëri detyrimet që rrjedhin nga kjo marrëveshje, pasi në të kundërt do të vihet në pikëpyetje autoriteti i vetë Komunitetit Evropian si palë nënshkruese në këtë Marrëveshje. Ashtu sikurse kërkohet të harmonizojnë dhe unifikojnë procedurat mes vendeve të ndryshme anëtare të Marrëveshjes Shengen si diçka vendimtare për mirë zbatimin e

Marrëveshjes. Vlerësohet se zbatimi i standardeve dhe kritereve të ndryshme për të njëjtën procedurë vize shkakton konfuzion në publik.

Ministri britanik: Do t‘i kapim të kërkuarit shqiptarë

Premtimi për drejtorin Prençi: Ndihmë edhe për ekstradimet


Britania do të bëjë të pamundurën
për ekstradimin
e personave të kërkuar
nga policia shqiptare. Garancia
u dha nga ministri i Shtetit për
Policinë, Krimin, Sigurinë dhe Çështjet
e Brendshme të Mbretërisë së
Bashkuar, z. Vernon Coaker, pas
takimit që pati dje me drejtorin e
përgjithshëm të Policisë së Shtetit,
Ahmet Prençi. Ai dha dhe një mesazh
të qartë për Policinë e Shtetit në këto
pragzgjedhje. Coaker u shpreh gjatë
takimit në Tiranë, se "jo të gjithë shqiptarët
që jetojnë në Britani janë
kriminelë. Por, nga ana jonë ne jemi
të gatshëm për arrestimin e personave
të kërkuar nga ana juaj dhe
mirëpresim çdo lloj informacioni që
mund të keni për shtetasit e kërkuar.
Ju premtoj se do të bëj të pamundurën
për t‘i ekstraduar të kërkuarit
për në vendin tuaj". Kjo deklaratë u
dha pasi kreu i policisë shqiptare ka
rikujtuar edhe një herë këtë çështje.
Për sa i përket bashkëpunimit
për arrestimin dhe më pas ekstradimin
e personave të kërkuar nga
drejtësia shqiptare, por që jetojnë
në Britani, drejtori i përgjithshëm i
Policisë së Shtetit u shpreh se "fatkeqësisht
në Britaninë e Madhe
jetojnë disa shtetas shqiptarë të
kërkuar nga ana jonë për disa vepra
penale. Me policinë kemi pasur
bashkëpunim të shkëlqyer,
por në disa raste, nga ana e gjykatave
është refuzuar ekstradimi i
tyre drejt vendit tonë. Ne jemi të
hapur për shkëmbim informacioni,
me qëllim ekstradimin e tyre
drejt vendit tonë", u shpreh Prençi.
Nga ana tjetër, drejtori i përgjithshëm
i Policisë së Shtetit falënderoi
ministrin Coaker për bashkëpunimin
e deritanishëm ndërmjet dy
policive. Sipas Prençit, Policia e
Shtetit është e vendosur për të
vazhduar më tej bashkëpunimin
me policinë angleze, kryesisht në
luftën kundër krimit të organizuar,
trafiqeve të qenieve njerëzore, arrestimin
e personave të kërkuar në
fushën e trajnimeve të oficerëve të
policisë shqiptare etj. Drejtori i
Përgjithshëm i Policisë së Shtetit
bëri një ekspoze të shkurtër të reformës
legjislative dhe organizative
që po i nënshtrohet Policia e
Shtetit. "Bashkëpunimi Policor
deri tani me homologët britanikë
është në nivele shumë të mira.
Vlerësoj me nota maksimale ndihmën
që na ka ofruar dhe ofron policia
juaj në fusha të ndryshme. Ne
ju garantojmë seriozitet dhe besnikëri
në misionin tonë të përbashkët,
në luftën kudër krimit në
përgjithësi dhe në veçanti kundër
terrorizmit, krimit të organizuar,
trafikut të paligjshëm ndërkufitar
etj.", u shpreh Prençi. Më tej, ai tha
se ndihma që ka dhënë dhe jep
Mbretëria e Bashkuar ndihet çdo
ditë me praninë e ekspertëve të saj
pranë Policisë së Shtetit, si dhe me
projektet që po implementohen
falë kësaj ndihme. "Në 10 vitet e
fundit, nga qeveria britanike janë
investuar për policisë shqiptare
rreth 4 milionë euro, të cilat janë
bërë në fusha delikate dhe të
rëndësishme, si në policinë shkencore,
në trupën e operacioneve speciale
etj.", tha Prençi. Gjithashtu,
drejtori i përgjithshëm i Policisë së
Shtetit nënvizoi faktin se intensifikimi
i mëtejshëm i këtij bashkëpunimi
do t‘i shërbente policisë
shqiptare për rritjen akoma më
shumë të aftësive profesionale.
Ndërkohë, që nga ana e tij, ministri
i Shtetit për Policinë, Krimin, Sigurinë
dhe Çështjet e Brendshme të
Mbretërisë së Bashkuar, Vernon
Coaker, pasi vlerësoi punën e bërë
nga Policia e Shtetit, garantoi Drejtorin
e Përgjithshëm të Policisë për
asistencë të vazhdueshme. "Shumë
e rëndësishme në punën e policisë
është ndarja e saj nga politika.
Gjithmonë policia duhet të jetë e
pavarur dhe të bëjë punën e saj",
deklaroi Vernon Coaker.


Nishani, Coaker-it: Ja si e kemi luftuar krimin


Ministri i Shtetit i Mbretërisë së Bashkuar është pritur
edhe nga ministri Nishani, ku janë njohur me punën
e njëri-tjetrit dhe kanë shprehur frymën bashkëpunuese
mes dy vendeve. Fillimisht, ministri i Brendshëm,
Bujar Nishani, e njohu ministrin
Coaker me disa nga arritjet kryesore
të Shqipërisë në luftën
kundër krimit të organizuar,
trafiqeve të paligjshme dhe korrupsionit,
forcimin e sigurisë në
vend dhe kontributin e vazhdueshëm
për sigurinë dhe bashkëpunimin
rajonal. Ministri i
Brendshëm nënvizoi si tregues
kryesor të këtyre arritjeve
goditjen gjatë tre vitev të fundit
të rreth 300 grupeve të krimit të
organizuar dhe vënien para
drejtësisë të afro 1000 anëtarëve
të këtyre grupeve. "Gatë kësaj
kohe, falë bashkëpunimit me
agjencitë e zbatimit të ligjit në
vendet perëndimore, me Europol-
in dhe Interpol-in, janë ekstraduar
dhe vënë para drejtësisë rreth 250 persona", tha Nishani.
Gjithashtu, duke vlerësuar rritjen e profesionalizimit të
Policisë së Shtetit dhe luftën me tolerancë zero kundër të gjitha
veprimtarive kriminale, Nishani evidentoi faktin se gjatë kësaj
kohe nuk ka pasur asnjë humbje jete në radhët e policisë,
përkundrejt 180 punonjësve të policisë që kanë humbur jetën
gjatë viteve 1997-2005. Nishani e njohu Coaker edhe me rezultatet
e luftës kundër të gjitha trafiqeve të paligjshme, menaxhimin
e integruar të kufirit dhe thellimin e bashkëpunimit
ndërkufitar me vendet fqinje. Ministri i Shtetit i Mbretërisë së
Bashkuar për Policinë, Krimin dhe Sigurinë, shprehu kënaqësinë
për progresin dhe arritjet e Shqipërisë në luftën kundër veprimtarive
kriminale, e po ashtu për bashkëpunimin e deritashëm
mes strukturave policore shqiptare dhe britanike. "Ne
nxisim bashkëpunimin rajonal dhe vlerësojmë rolin e kontributin
e Shqipërisë në këtë drejtim. Dëshirojmë të thellojmë bashkëpunimin
dhe të ndihmojmë në luftën e përpjekjet tuaja
kundër të gjitha veprimtarive kriminale dhe trafiqeve të
paligjshme. Progresi juaj, i cili është i dukshëm, i shërben dhe
është një tregues pozitiv për rajonin, Bashkimin Evropian dhe
Mbretërinë e Bashkuar", u shpreh ministri Coaker.

"Kristopuli është dhunuar nga SHIK në Vain të Lezhës"

Ish-drejtori i Shërbimit Informativ, Ilir Cenollari, rrëfehet në gjyqin për Remzi Hoxhën


Shërbimi Informativ Kombëtar,
me në krye të
ndjerin Bashkim Gazidede,
ka dhunuar tre shtetas
në Vain të Lezhës. Deklarata
vjen nga Ilir Cenollari, pasuesi
i Gazidedes në SHIK, në Gjykatën
e Krimeve të Rënda, ku ishte thirrur
për të dëshmuar. Ish-drejtori i
komanduar, Cenollari, ka dëshmuar
para togave të zeza detaje
mbi shoqërimin e Ziso Kristopulit
në Vain të Lezhës. Cenollari tha
se strukturat e SHIK kishin marrë
kërkesë nga Presidenca për informacione
rreth shtetasit Kristopuli
dhe nga ku më pas ishte shoqëruar
në Lezhë për verifikim. Gjatë
dëshmisë së tij, Cenollari tha se
gjatë viteve ‘98-‘99 kishte kontaktuar
rastësisht me Ziso Kristopulin
në ambientet e SHIK-ut, pasi ky
i fundit kërkonte të bënte kallëzim
për keqtrajtim nga strukturat e
Shërbimit Informativ. Ish-drejtori
i komanduar dëshmoi se në lidhje
me ngjarjen ishin bërë verifikimet
e nevojshme në terren dhe deklarimet
e Ziso Kristopulit rezultonin
të vërteta mbi ambientet e
ndodhura në Lezhë.
Dëshmia
"Me Ziso Kristopulin jam njohur
rastësisht. Ka ardhur çështja
nga punonjësit tanë, ka bërë një
ankesë në të cilën thuhej se ishte
ushtruar dhunë nga ish-punonjësit
e Shërbimit Informativ para
vitit 1997. Për këtë procedurë janë
njoftuar instancat e larta të shtetit",
filloi dëshminë ish-drejtori i
komanduar i SHIK-ut. Sipas tij,
Ziso Kristopuli i kishte ardhur në
zyrë nëpërmjet punonjësve të
Shërbimit Informativ të Sarandës,
shoqërisht, ku dhe është pyetur e
marrë informacion. "Ne kemi bërë
përpjekje dhe na është kërkuar
informacion nga Presidenca e Republikës.
Kam mbledhur të dhëna
për këtë çështje dhe në rrugë
zyrtare kam dhënë shpjegime.
Shtetasi është marrë, dhe pasi
është shoqëruar nga drejtori i
SHIK-ut Sarandë, Metlut Vatraku,
së bashku dhe me mua kemi shkuar
në Lezhë, atje ku kemi pasur
ne shtëpinë, ka qenë e shkatërruar.
Aty Ziso Kristopuli më ka pohuar
që e kishin sjellë në këtë vend",
ka vijuar Cenollari, duke shtuar se
vendi në të cilin ishte dërguar
Kristopuli quhej Kune. Kristopuli
e kishte vënë në dijeni se punonjësit
e SHIK-ut të asaj kohe e kishin
marrë dhe kishin përdorur
dhunë ndaj tij. Dëshmitari ka
treguar se gjithçka është e dokumentuar,
madje kishin mbajtur
një deklaratë për Kristopulin. Mësohet
se gjatë kësaj kohe nuk ishte
përmendur asnjë emër se kush
mund të qenë personat të cilët e
kishin shoqëruar Ziso Kristopulin.
Dëshmitari ka mbyllur dëshminë
e tij duke thënë se nuk e njihte të
pandehurin Avni Koldashi.
Seanca
Në seancën e djeshme gjyqësore,
dëshmitari i dytë i thirrur nga
ana e Prokurorisë së Krimeve të
Rënda për të dhënë deklarime ishte
Aziz Tërsia, ish-punonjës në
SHIK. Ai ka shpjeguar vetëm faktin
që targat që ata përdornin ishin
private. Ndërkohë, prokurori
Xhevat Hana ka lexuar dje deklarimet
e dhëna të shtetasit Maksim
Kroi para oficerëve të policisë
gjyqësore, i cili dëshmonte se kishte
qenë punëtor në pularinë e shtetasit
Ziso Kristopuli. Sipas tij,
ditën që Ziso ishte rrëmbyer, ai ishte
vënë në dijeni nga bashkëshortja
e tij, ndërsa shpjegonte se më
pas nuk ishte takuar më me atë.

Kristopuli: SHIK-u më shkatërroi jetën


Ziso Kristopuli është një nga të
rrëmbyerit e SHIK-ut në vitin 1995.
Arsyet e kësaj ai nuk i kupton dhe
për këtë kërkon shpjegime. Kristopuli jeton
në Sarandë dhe ajo ngjarje e 13 viteve
të shkuara e ka goditur
rëndë. "Unë kam pasur një
biznes të mirë. Kam pasur
një pulari, një serë diellore,
një lokal buzë detit. Dhe
nuk desha të merresha me
politikën e madhe, desha
të merresha me politikën e
vogël. Ku më gjetën mua
nga Maqedonia në Sarandë?
Kush isha unë? Cili
isha unë që mund të arrija
të përmbysja pushtetin e
Berishës? Cili isha unë që
mora vulën nga Serbia
dhe vulosa tërë fletët e referendumit
të Jugut që
humbi Kushtetutën e vitit
1994? Nuk e imagjinoj dot veten dhe nga
këto dua të çlirohem. Nga këto duhet të
heq ankthin. Kam duruar shumë gjëra.
Kam humbur pasurinë time. Kam humbur
familjen time. Kështu që dua të mësoj
të vërtetën", është shprehur Kristopuli,
pas dërgimit të dosjes nga prokuroria
në gjykatë.

Shpërthen bombola e gazit, plagosen rëndë katër anëtarë të një familjeje

Sipas mjekëve, nënë e bir janë në gjendje kritike për jetën


Katër persona, tre prej tyre pjesëtarë të një familjeje kanë mbetur të plagosur rëndë për shkak të shpërthimit të një bombole gazi në banesë. Ngjarja e rëndë ka ndodhur paraditen e djeshme në Tiranë, ndërkohë që katër të dëmtuarit, ndodhen në spital, ku janë në gjendje kritike për jetën. Burrë e grua, bashkë me të miturin e tyre të paralizuar, kanë qenë duke ndenjur në shtëpi, kur u kishte ardhur për vizitë edhe një e afërm. Papritur ka shpërthyer bombola e gazit në formën e eksplozionit, duke iu vënë flakën të gjithë të pranishmëve, të cilët kanë pësuar djegie në masën 70%. Burimet zyrtare nga Drejtoria e Policisë së Tiranës bënë të ditur se Komisariati Nr. 4, në orën 09.30, në rrugën "Myslym Keta", është njoftuar se është djegur banesa e shtetasit Fadil Ali Lika, 51 vjeç, lindur dhe banues në adresën e mësipërme. Menjëherë në vendngjarje kanë shkuar shërbimet zjarrfikëse dhe policia, të cilët u kanë dhënë ndihmën e parë të dëmtuarve dhe kanë shuar flakët. Nga kryerja e veprimeve hetimore, rezultoi se në banesë ka shpërthyer bombola e gazit në formën e eksplozionit, e cila ka qenë me defekt. Për pasojë janë dëmtuar të gjithë pjesëtarët e familjes, ku në gjendje kritike për jetën janë Nadire Lika, 42 vjeçe dhe djali i saj, Eridion Lika, 9 vjeç, i cili ka qenë i paralizuar më parë. Por, edhe Fadil Lika dhe Hanke Zeqiri, 56 vjeçe, kanë pësuar dëmtime serioze për jetën dhe ndodhen të shtruar në pavijonin e djegies në Qendrën Spitalore Universitare të Tiranës "Nënë Tereza". Policia tha se dy të fundit janë jashtë rrezikut për jetën, ndërkohë që edhe dëmet materiale janë të konsiderueshme.

Arrestohet polici, bashkëpunoi me hajdutët

Punonjësi i policisë u kap duke drejtuar një makinë të vjedhur. Në pranga edhe tre "civilë"


Një punonjës policie i Tiranës dhe tre bashkëpunëtorët e tij nga Durrësi dhe Elbasani kanë përfunduar në pranga. Shërbimi i Kontrollit të Brendshëm në Policinë e kryeqytetit ka ndihmuar agjentët e antikrimit ndaj pronës në Durrës në zbardhjen e vjedhjes së një automjeti që pati ndodhur në ditën e çlirimit të atdheut, më 29 nëntorin e kaluar. Ditën e djeshme, rreth orës 01.30, u arrestuan shtetasit Martin Arrëza, 22 vjeç nga Korça, punonjës policie në Komisariatin e Policisë nr.3 në Tiranë; Gentjan Shijaku, 38 vjeç, i papunë nga Durrësi, kushëriri i tij, Artur Shijaku, 35 vjeç, po banor i këtij qyteti, si dhe Dorian Dedja, 25 vjeç nga Gjinari i Elbasanit. Të katërt u arrestuan pasi në bashkëpunim me njëri-tjetrin kanë vjedhur automjetin "Volkswagen" me targa TR0892G të shtetasit Neim Zeqiri. Tre muaj pas vjedhjes është bërë e mundur të zbardhet ngjarja dhe autorët e saj. Automjeti u gjet të hënën në qytetin e Tiranës dhe drejtohej nga punonjësi i policisë, Martin Arrëza.

Vetëm pas ndalimit të tij dhe kryerjes së veprimeve hetimore u bë i mundur identifikimi dhe kapja e bashkëpunëtorëve të tjerë. Në cilësinë e provës materiale është sekuestruar automjeti. Ndërkohë, po punohet për të dokumentuar edhe disa vjedhje të tjera automjetesh të ndodhura gjatë muajve të fundit në Durrës.

Ndërkaq, një tjetër vjedhje ka çuar në procedim penal dy të mitur, të cilët për shkak të moshës ndiqen në gjendje të lirë. Dy të miturit nga Shijaku, nxënës të klasës së tetë, i kanë vjedhur një shtetaseje nga Durrësi çantën me dy celularë dhe një kuletë në të cilën kishte 38 mijë lekë të reja. Paratë dhe aparatet e telefonit iu gjetën fëmijëve në çastin e ndalimit.

HI